Tuesday, August 8, 2017

சித்திரை வெயில் வாட்டுதே !

ஆசுவாசமாய் பொழுதை கழிக்க
ஆயிரம் இடம் தேடி - எம்மை வந்தடைந்தாரோ
ஆதவன் ? அவர்தம் ஓசோன் மெத்தையில்
ஓட்டையிட்டு  விட்டதனால் வேறு வழியறியாது
வான் வெளியில் மிதந்து திரிகிறாரோ ?

தண்மை வழங்க தலையசைத்தாடி வரவேற்கும்
மரங்களின் மடியில் சற்றே இளைப்பாற எண்ணியே
எங்கெங்கும் தேடித் திரிய - உயிரும் உணர்வுமான மரங்கள்
கற்கட்டிடங்களாக உருமாறிக் கிடக்க - ஏமாற்றத்தால்
ஏங்கியே அக்கினி பெருமூச்சினை விடுகிறாரோ ?

செயற்கையாகிப் போன தன் மன எண்ணங்களை போன்றே
இயற்கையை விஞ்சிட எத்தனித்து செயற்கை படைக்க
துடிக்கும் மானுட இனத்தை பழி வாங்க - இயற்கை
கையிலெடுக்கும் ஆயுதம் தான் சுட்டெரிக்கும் வெயிலும்
சுழன்றடிக்கும் காற்றும் மழையும் - தாங்கவொன்னா குளிருமோ ?

இயற்கையில் தன் செயற்கை குப்பைகளை திணித்து விட்டு
அந்தக் குப்பைகளே கோமேதகக் கோபுரங்களென எண்ணி
பெருமிதம் கொள்ளும் நாமனைவரும்  திருந்தி - கண் திறக்க
காலம் நெருங்கி நம்மை நெருக்கிக் கொண்டிருக்கிறது !
இயற்கையோடு இயைந்து மகிழ்வோம்! இன்பமாய் வாழ்வோம் !

Sunday, August 6, 2017

நட்பு




சிறு புன்னகையே ஆரம்பமாய்
சில கையசைப்பும் தலையசைப்புகளே
காரணமாய் - மனமதில் காலத்திற்கும்
உறுதியாய் திகழவிருக்கும் உறவிற்கோர்
அடித்தளமாய் ! - சிறு பொறியென 
மனதிற்குள் விழுந்த நட்பு !
காலம் ஏற்றும் சுமையனைத்தும்
பனிப்பாறைகளாய் அழுத்த
பனிக்கடியில் கதகதப்பூட்டும்
வெப்ப அலைகளாய் - மனதின்
அடியாழத்துள் நினைவுகளாலேயே
மருந்திட்டு ஒத்தடம் கொடுக்கும்
இனிய நட்பு !

Sunday, January 22, 2017

வரவேற்போம் புத்தாண்டையே !

குருவி கொத்திச் சேர்க்கும் நெல்மணி போல்
மனதில் நாளும் குன்றிமணியாய் வளர்ந்து 
மனதின் அடியாழம் வரை
வேரோடி நிற்கும் ஆசைக் கனவுகள் !

கனவுகள் நனவாக ஆர்வமதை வித்தாக்கி
முயற்சி தனை நீராக்கி பயிற்சி தனை உரமாக்கி 
எதிர்வரும் தடைகளெலாம் வளர்ச்சிப் படிகளாக்கி
நாளொரு மேனியும் பொழுதொரு வண்ணமுமாய் - வளரும் ஆசை விருட்சம் !

உள்ளத்து எண்ணமெலாம் உயர்வாய் அமைய
எண்ணமதன் பிரதிபலிப்பு செயலில் தெரிய
முயற்சி அளித்த பலனாய் - வெற்றிக் கதவுகள்
திறந்து வழிவிட - காத்துக் கிடக்கும் !

நல்லன எண்ணும் இதயங்கட்கெலாம்
பிறக்கும் நாள் ஒவ்வொன்றும்
புது நாளே ! மாறி வரும் வருடமெலாம்
வசந்தங்களின் வழித்தடங்களே !


பெண்மை இணைய தளம் நடத்திய புத்தாண்டு கவிதை போட்டிக்கு எழுதிய கவிதை.

Wednesday, October 5, 2016

நினைவுகள்



மூடிய வாசற் கதவுகளை
நனைத்துப் போகும் 
மழைச் சாரலைப் போல
சில நினைவுகள் -
மனதின் அடியாழத்துள்
ஒளிந்து கொண்டிருக்கும்
உணர்வுகளுக்கு கண்களை
வடிகாலாக்குகின்றன - கண்ணீராய் !
நினைவுகள் ! - நிமிடங்களை  நகர்த்துகின்றன !
நல்லன ... அல்லன .... எதுவாயினும்
வாழ்வின் பொழுதெலாம்
நினைவுகளாலேயே நிரப்பப்படுகின்றன !
மறத்தல் எனும் யுக்தி -இயற்கை
அளித்த ஆதாயமாய் நம்முள் இருப்பினும்
ஏனோ மனம் - மறத்தலை விடவும்
நினைப்பதிலேயே மூழ்கி விடுகிறது !
நாளும் இயந்திரமாய் நகரும் வாழ்வுதனில் 
மனித மனங்களை நாளும் ஆக்கிரமிப்பவை 
நினைவுகளே ! நினைவுகளன்றி வேறொன்றுமிலையே !
நினைக்கும் நினைப்பெல்லாம் நல்லனவாய் இருக்கட்டும் -
நல்லன எண்ணும் மனங்களில்
மகிழ்வும் பொங்கிப் பிரவாகமெடுக்குமே !
நட்பு  சுற்றமனைத்தையும் 
மகிழச் செய்து மகிழ்ந்திடுமே !

Wednesday, September 28, 2016

உடல் தந்தாய் உயிர் தந்தே



ஊண் உறக்கம் ஓய்வெல்லாம்
நேரம் கிடைக்கையில் தானுமக்கு
இருக்கும் நேரமெல்லாம் பிள்ளைகட்காய்
உழைப்பதிலேயே கடந்தது !
உடல் நோக நீங்கள் உழைப்பதினால்
மகிழ்வு  மட்டும்  சூழ்ந்த நந்தவனமானது
எம் வாழ்வு ! கால் கடுக்க நடந்ததுமில்லை
புத்தகச் சுமை சுமந்து பழகவுமில்லை !
உங்கள் அனுபவங்கள் எல்லாம்
எம் உள்ளந்தனில் பாடமாய் பதிய
நினைவை விட்டகலாது வாழ்க்கை நெறிகள் !
உழைத்து உழைத்து உருமாறியும்
ஓடாய் தேய்ந்தும் போனது - உங்கள் உடல் !
வாழ்வெனும் அருங்காட்சியகத்துள்
உறுதியான பொலிவான சிலைகளாய்
உங்கள் சந்ததியினர் ஜொலிக்க !
ஒவ்வொரு மனிதனுக்கும் உண்டு மதிப்பு
அதை உணர்ந்து நடந்து கொண்டால்
உலகில் உயரும் உனக்கான
அன்புநிறை மனங்களின் ஆதரவு !
உயர் வாழ்க்கைப் பாடம் கற்பித்து -உணர்வுநிறை
 ஆன்மாவாய் எம்மை உலவ விட்டீரே
எனதன்புத் தந்தையே !



சித்திரை மகளே வாராய் !

சித்திரை மகளே வாராய் !
சிந்தை மகிழ்விக்க வாராய் !
சந்தமாய் உலக வாழ்வு தனை
சந்தித்து மகிழ்ந்திட வாராய் !
சிந்தும் மழையும் தான்
இதயம் குளிர்விக்க வேண்டுமே !
அடிக்கும்  வெயிலும் தான்
அளவாய் சுட்டால் போதுமே !
சுருங்கும் மனங்களும் தான்
சற்றே விசாலமாகட்டுமே !
தன்னலம் மறந்த நிலையதில்
பொதுநலம் உலகை வழிநடத்துமே !
அன்பே வாழ்வதன் ஆதாரமென்பதை
உணரும் நாளும் வரட்டுமே - பணமே
பிரதானமெனும் மாய எண்ணம்
மனங்களின்று விலகட்டுமே !
இன்னல் எல்லாம் பனியென
கரைந்து ஓடட்டுமே ! - இன்பம்
புது வெள்ளமென பொங்கி வரட்டுமே !
புத்தாண்டினை - நல்ல எண்ணங்களோடு
நல்வாழ்வினையும் சேர்த்தே வரவேற்போமே !

சிறகை விரித்திடு !






சிறகை விரித்திடு

சித்திரப் பெண்ணே !
உலகிற்கே பொதுவான
வானம் - அது உன்னையும்
ஏந்திக் கொள்ள
எந்நாளும் தயாரே !
அடிமைத் தளைகளை
உடைத்தெறிந்து
உன்னதமாய் உலகை
வலம் வா !
அடக்கமும் அமைதியும்
உன்னுள் இருக்கட்டும் !
வீரமும் விவேகமும்
விழிப்புடனே இருக்கட்டும் !
அச்சமும் நாணமும்
கொண்டிருந்த காலம்
மலையேறட்டும் !
தைரியமும் தெளிவும்
எப்போதும் உனக்கு
துணையாகட்டும் !
ரவுத்திரம் பழகு !
வேதனை சோதனை என
அனைத்தும் உன்
சாதனைக்கு அடித்தளமாகட்டும் !
துணிந்து முன்னேறு -
உலகமே காத்திருக்கிறது
உனக்காய் !


Related Posts Plugin for WordPress, Blogger...